DAVAO CITY – Wala na gikatingala sa DepEd 11 ang namatikdang pag-ubos sa mga nagpa-enrol karong school year 2023-2024.
Gikanayon ni DepEd 11 spokesperson Jenelito “Dodong” Atillo nga gumikan kana sa tinuig nga pamatasan sa pipila ka mga ginikanan nga ipa-enrol ang ilang mga anak sa mga tulunghaan paghuman sa gitaganang enrolment period.
Hinuon, gipanumbalingan sab sa buhatan ang pipila ka mga rason sa mga ginikanan sa pag-uktaba sa pagpa-enrol sa ilang mga anak sama sa pagkatanggong sa trabaho o sa kalisdanan sa panahon.
Nagpahibalo sab ang opisyal nga kon ugaling ipa-enrol ang ilang mga anak tunga-tunga sa pagsugod sa klase, kinahanglan na ang interbasyon sa prinsipal sa tulunghaan tungod bugtong ang DepEd secretary lamang ang mulugway sa enrolment period.
Nagpahinumdom sab ang opisyal ngadto sa mga ginikanan nga dili i-pressure ang tulunghaan sa pagpa-enrol sa ilang mga anak, sanglit maayong ipaagi kini sa tukmang proseso.
Ning kasamtangan, anaa sa dul-ang usa ka milyon ka mga magtutungha sa rehiyon onse gikan elementarya ug high school sa dul-ang dos mil ka mga tulunghaan ang misugat sa Balik Eskwela sugod adlawng Martes, a-29 sa Agosto.
via || Bombo LJF
