DAVAO CITY – Gipalanog-lanog sa mga delegado sa Davao Region ang tibuok Marikina Sports Center sa kauluhan alang sa Opening Ceremonies sa Palarong Pambansa 2023 kagahapon sa hapon.
Napuno sa masadyaong ug makalingaw nga pagmartsa sa mga manduduwa nga dungang nagsugat sa unang adlaw sa Palaro karong tuiga taliwala sa uwanon nga panahon.
Gipakita sab sa mga delegado ang ilang makalingaw nga pagsayaw sa Tiktok dance craze nga “Ting-tang.”
Nakadani sab og atensyon sa mga manan-away ug sa ubang mga atleta ang mga tribal attires ingon man ang mascot sa Davao Eagles.
Dungan sab nga nakigsayaw sa mga atleta si Deped 11 Regional Director Allan Farnazo.
Gisaksihan sab kana nila Pangulong Bongbong Marcos ug Bise Presidente ug Education Secretary Sara Duterte ang nahitabong opening ceremony.
Gikanayon ni PBBM nga nagtuo siya sa makapabag-ong gahum sa sports alang sa paghulma dili lamang sa ilang kusog ug kahawod, kon dili sa pagbaton og maayong disiplina ug pamatasan.
Giawhag sab sa pangulo ang DEPED sa pagpadayon sa paglusad og mga programa alang sa mga kabatan-onan.
Kini na ang pinakaunang pagpahigayon sa Palarong Pambansa human sa dul-ang 3 ka tuig nga pagkahunong niini gumikan sa pandemya.
Gibanabanang anaa sa 9,172 athletes, coaches ug officials gikan sa 17 ka rehiyon sa Pilipinas ang dungan nag magsangka alang sa 34 ka mga sporting events nga mulungtad hangtud Agosto 5.
via || Bombo LJF
