DAVAO CITY – Misaka na sa lima ka mga trabahante ang nakabsan sa kinabuhi ug duha ang gikatalang samdan sa nahagsa nga bag-ong tulay sa may Sitio Kibakak, Brgy. Malamba, Marilog District, Davao City niadtong adlawng Lunes, bandang 4:45 sa hapon.
Una nang gikataho sa station commander sa Marilog Police nga si P/Cpt. Ruel Dionela, atol sa pakighinabi sa Bombo Radyo Davao, nga samtang nagtrabaho ang napulo ka mga empleyado sa Bojus Sun Builders & Supply Corporation nga nagtaud og side panel sa maong tulay gamit ang boom truck, kalit na lamang nahugno ang tulay ug nahulog sa tubig nga dunay gilawmon nga 60 feet lakip ang 7 ka mga trabahante nga na trap sa ilawom.
Gawas kang Rolando Bongguyan Abing, 40 anyos nga trabahante, kinsa naka-angkon og head fracture; ug ang mason nga si Jay Bangonan, 22-anyos nga mga unang casualty sa maong katalagman, usa ka patayn’g lawas sa drayber sa mismong boom truck nga giilang si Jimboy Luega, 28-anyos, nga taga-Pagan Grande ang unang narekober kagahapon sa buntag.
Nahilakip sab niini si Elmer Sayson, 44 anyos nga foreman ug responder, ug residente sa Banay-Banay, Davao Oriental; ug si Cris Napao, 44 anyos nga mason, taga-Matina Balusong nga namatay sa insidente.
Apan luwas sab nga gidala sa Southern Philippines Medical Center ang duha ka pulos samdan nga mga biktima nga sila Meljay Bero, 29-anyos nga mason nga taga-Monkayo, Davao de Oro; ug Jonathan Dispo, 38-anyos nga trabahante nga taga-Catalunan Grande, ning syudad.
Gibutyag ni Dionela nga adunay usa sa mga biktima ang gikalisdan nga kuhaon ilawom sa Davao CDRRMO tungod nadat-ugan kini sa boom truck ug sa mga structures.
Samtang sa pikas bahin, gikasubo sa kabanay sa usa sa mga namatay nga si Marivic Abing Bravo ang nahitabo sa iyang igsuon.
Matud pa sa maguwang ni Rolando Abing, nadunggan nila ang kusog nga paka sa nahugnong tulay human sa pipila ka adlaw nga pag-ulan.
Nakadalikyat pa og lahos ang igsuon ngadto sa gipanghitaboan sa disgrasya sa dihang nasayran nga usa diay si Rolando sa mga nakabsan sa kinabuhi.
Hinuon, tubagon matod pa sa kumpanya ang galastuson sa pagpalubong lakip na pagpaskwela sa nahabilin niyang mga anak.
