DAVAO CITY – Nasikop sa mga kapulisan sa Police Regional Office 12 partikularmente na sa Makilala Municipal Police ug Kidapawan City Police ang pito ka mga giilang holdaper ug kawatan gikan Davao Oriental atol sa gikasang hot pursuit operation sa Jose Abad Santos Street, Poblacion, Kidapawan City.
Giila sa mga otoridad ang pito ka mga suspek nga sila Gemar Solidag Tipan, 36 anyos, taga-Banay Banay; Manilito Paragas Linda, 42 anyos, taga-Don Salvador; Dennis Singson Sefuentes, 40 anyos, residente sa Banay Banay; Denver Jay Sefuentes, 35 anyos, taga-Baganga; Arcadio Dupa Sefuentes, 57 anyos, taga-Don Salvador, Mati, Davao Oriental; ug si Allan Colita Miesco, 49 anyos, bugtong taga-Dujali, Davao del Norte.
Sigon sa report sa PRO 12, ilang girespondehan ang usa ka insidente sa robbery hold-up sa maong kadalanan sa Kidapawan City, diin nabiktima ang mga empleyado sa usa ka food manufacturing company.
Duha sa mga suspek ang nitutok kanila sa ilang pusil ngadto sa mga biktima dihang nagdeklara og holdap.
Gilimas sa mga suspek ang bag nga nag-unod og kwarta ug dali nakasibat sa wa matinong direksyon. Naglusad ang PRO 12 og operasyon kaabag ang Davao Oriental Police Provincial Office diin paspas nilang na-track ang direksyon sa getaway vehicle nga ilang gisakyan.
Gipaalerto sab ang mga otoridad sa mga kasikbit nga lungsod nga nagresulta sa paspas nga pagkasikop sa mga suspek.
Nakumpiska gikan sa mga dinakpan ang usa ka Mitsubishi Strada nga sakyanan, klase-klaseng armas ug bala, mga cellphone, pitaka ug ID sa mga suspek, passbook, kapin P35,000 nga kwarta, ug 2 ka pakete sa gidudahang shabu.
Gikustodiya na ang mga dinakpan sa Makilala Municipal Police Station Custodial Facility human sa hinanaling medical examination sa Makilala Midway Hospital.
Gidala na ang mga ebidensya sa Provincial Forensic Unit sa Kidapawan City alang sa ballistic and chemistry examination alang sa tukmang disposisyon, samtang ginahikay na ang mga dokumento alang sa ilang inquest proceedings.
via || Bombo LJF
