DAVAO CITY – Mibisita sa haya sa hit-and-run victim nga si Mark Ken Mariscal si Davao City Mayor Sebastian Duterte.
Personal nga nagpadangat og pahasubo sa pamilya ni Ken ang mayor sa paghapit niini sulod sa duha ka oras.
Kaganihang kaadlawon, nagpadayag sab sa ilang pahasubo ang mga kaubanan ni Ken pinaagi sa ilang pagkanta sa haya sa nitaliwan nga singer.
Una pa man siya mipanaw, nahimong ilado ug in-demand nga singer si Mark Ken diin sagad siyang ginakuha nga mukanta sa mga gigs ug corporate events sa Davao ug ubang bahin sa Mindanao.
Kahinumduman nga nakabsan sa kinabuhi si Mariscal niadtong Dominggo sa kaadlawon human kini mabanggaan sa puti nga sakyanan.
Gipangita pa gihapon sa mga otoridad ang drayber nga nakaligis kang Mariscal, samtang nagakalap pa og ebidensya atol sa imbestigasyon ang Buhangin Police, partikular na ang CCTV footage sa gipaghitaboan sa insidente sa Cabantian ning dakbayan.
via || Bombo LJF
