DAVAO CITY – Papanubayan karon sa gimugnang Special Investigation Task Group kon SITG ang paspas nga pagresolba sa kaso sa kamatayon sa 28 anyos nga babaye nga si Architech Vlanche Marie Bragas.
Gilangkuban kini ni Colonel Thor Valiente Cuyos gikan sa Deputy Regional Director Office isip head sa task force, inubanan sa Davao City Police Office ug CIDG 11.
Sumala pa sa gipagawas nga autopsy report sa Regional Forensic Unit 11, kompirmadong gilugos ug gituok-patay ang biktima nga napalgan sa usa ka kanal sa sagingan sa Calinan, ning dakbayan.
Tungod niini, gipasaka na sa Rape with Homicide ang nahitabong krimen.
Nasayran sab nga ulahing nakit-an ang biktima pasado alas 12:30 sa kadlawon nga nagsakay sa usa ka yellow nga bao-bao nga traysikel kon “ongbak”.
Gikumpirma sab nga usa ka trabahante sa sagingan ang nakakita sa patayng lawas ni Bragas pagkabuntag human sa insidente.
Gikumpirma sab sa DCPO nga ginalantaw sab nila ang anggulo nga posibleng dili lamang usa ka tawo ang responsable sa kamatayon ni Bragas.
Samtang talilwala sa kahadlok gumikan sa nahitabong kamatayon ni Bragas diin gitataw nila kini isip hulga sa ilang nagkandaiyang panginabuhian, andam mutabang ang mga opisyales lakip na ang tricycle drivers association sa Brgy. Dacudao, Calinan alang sa daling pagkakaplag sa suspek.
Sa kasamtangan, wala pay posibleng lead ang DCPO sa pagkatawo sa suspek, apan gidasig karon ang mga nakasaksi nga ibutyag ang ilang mga nasayran sa makasubo nga gidangatan sa arkitekto.
Pagpaklaro sa kapulisan nga isolated case lamang ang maong panghitabo, ug sa kasamtangan, dili angayng kabalak-an ang estado sa seguridad dinhi sa dakbayan.
via || Bombo LJF
