DAVAO CITY – Gipasalig sa Davao City Police Office nga walay dapat kabalak-an ang mga negosyante sa mga hilit nga lugar dinhi sa dakbayan, sanglit isolated case lamang ang nahitabong hold-up sa usa ka courier sa Poblacion Calinan, Davao City niadtong Mayo 9 sa gabii.
Sumala ni DCPO Spokesperson Police Major Catherine Dela Rey sa ekslusibong pakighinabi sa Bombo Radyo Davao, duna nay upat ka persons of interest nga gitutukan ang Calinan Police mahitungod sa maong pagpang-hold up diin nalimas ang anaa sa P1.2 million nga kantidad sa kwarta ug pipila ka mga parcel gikan sa opisina sa usa ka courier.
Dugang pa sa opisyal, nakatabon ang nawng sa mga gituohang suspek niadtong tungura nga sakay sa motorsiklo.
Nadis-armahan sab ang gwardya ug wala na makahimo sa pagpugong dihang gipangtiunan kini sa mga tulisan.
Gikumpirma sab sa mga tigdumala nga nibalik sa normal ang operasyon sa opisina sa courier company.
via || Bombo LJF
