DAVAO CITY – Gikabalak-an sa Philippine Mental Health Association ang ilabihang pagsaka sa ihap sa mga nagkutlo sa kaugalingong kinabuhi dinhi sa Davao Region.
Gikabutyag ni Choefilo Limikid, Executive Manager sa PMHA – Davao Chapter, atol sa pakighinabi sa Bombo Radyo Davao, nga namatikdan ang pagkunsad og 100% sa mga suicide cases sa rehiyon sulod sa lima ka tuig.
Base sa datos sa PMHA – Davao, miabot na sa 53 ang recorded cases sa suicide diin kasagaran sa mga biktima pulos batan-on nga anaa sa 13 hangtod 20 anyos ang pangidaron.
Sumala pa ni Limikid, naiwit na matud pa ang nahimong pagtubag sa maong mga kaso sanglit reactive inay preventive ang nakitang pamaagi sa publiko sa pagtubag sa mental health crisis.
Gikanayon sab sa opisyal nga kinahanglang panubayan ang mental health sa usa ka indibidwal susama sa paghatag og saktog pag-atiman sa pisikal nga kahimsog sa tawo.
Gipunting sa eksperto nga importanteng batunan sa indibidwal ang maayong relasyon sa isigkaingon isip yawe sa maayong panghuna-huna.
Dagkong hagit sab sa pagsagubang sa maong isyu ang presensya sa social media diin ginapangita sa mga biktima ang validation ug pagdawat nga wala masinatian gikan sa ilang pamilya.
via || Bombo LJF
