DAVAO CITY – Gipanghimakak ni Tagum City Mayor Rey Uy nga nagkaluag ang seguridad sa syudad.
Kana taliwala sa managlahing serye sa pagpamatay sa 9 anyos nga batang babaye ug 18 anyos nga babayeng working student nga nahitabo sa ilang syudad.
Matud pa sa mayor, walay hunong ang pagbantay sa mga security forces nga nagapatrolya sa matag barangay sa syudad ilabi nang sa hisgutanan sa ilegal nga droga.
Nagpahibalo ang mayor nga mag-igmat ang katawhan alang sa kaluwasan sa pamilya og komunidad. Nagbahad sab ang mayor ngadto sa mga kriminal nga ila silang papanubagon ug pagasilutan sa balaod.
Gikanayon ni Uy nga nag-atubang og dakong suliran ang kapulisan sa Tagum City gumikan sa kakuwang sa pwersa nga magbantay sa kapin tres syentos mil ka mga residente sa Tagum City.
Naghangyo na ang alkalde ngadto sa Police Regional Office 11 nga dungagan ang ihap sa mga pulis sa lugar, ug kasamtangang nagpaabot ang panggamhanan sa ilang aksyon sa maong hangyo.
via || Bombo LJF
