DAVAO CITY – Nakabalik na sa nasud ang giilang notoryus na lider sa New People’s Army na si Eric Jun Casilao. Sumala pa sa 10th Infantry Division sa Philippine Army, una nang nasikop si Casilao sa Jeti Point International Clearance Gate, sa Langkawi, Malaysia kaniadtong Abril 1.
Atol sa iyang pagkasikop, dungan nga naglusad og joint law enforcement operation ang mga sakop sa AFP, PNP, National Intelligence Coordinating Agency, Bureau of Immigration, ug Department of Foreign Affairs, inubanan sa pwersa sa Royal Malaysian Police ug Malaysian Immigration, nga nagresulta sa pagkasikop ni Casilao samtang mubyahe unta kini paingon Koh Lipe, Thailand.
Nahilakip si Casilao sa Red Notice List sa Malaysia gumikan sa pagpameke sa detalye sa iyang passport ug paggamit sa laing persona.
Napriso una ang nahisgutan sa maong nasud una siya gipa-deport pabalik sa Pilipinas kagahapong Lunes, Abril 17. Giila si Casilao isip usa sa mga notoryus nga lider sa koministang grupo nga nagpahigayon og mga akto sa terorismo. Nalambigit sab kini sa mga krimen sa pagpamatay, pagpangidnap, serious illegal detention, ug attempted murder.
Gikabutyag sa kanhi sekretarya sa Guerilla Front 55 nga si Arian Jane Ramos, nga una silang nagtuo nga naniid lang sa ubang komitiba sa NPA si Casilao.
Dugang pa, nibiya siya sa CPP gumikan sa mga kalisdnanan nga ilang nasinatian. Giuyunan sab ni Joy James Saguino, kanhi Deputy Secretary sa Sub-Regional Committee 1 sa CTG ang pahayag ni Ramos nga gipasagdan matud pa sila ni Casilao taliwala sa nagkahuyang nga kusog sa rebeldeng han-ay.
Sumala pa ni 10ID Commander Major General Jose Eriel Niembra, nga walay lugar sa nasud o maski sa gawas pa sa nasud ang mga nangulo sa CTG bisan pa man magtago-tago pa sila.
Gumikan sa maong pagkasikop, gikanayon ni 10ID Spokesperson Major Mark Anthony Tito nga usa kini nga dagkong kalampusan sa pagpatuman sa kalihukan alang sa kalinaw sa Mindanao.
Nahimong Secretary sa Southern Mindanao Regional Committee si Casilao, ug usa sab siya ka myembro sa Central Committee sa Communist Party of the Philippines, Communist Terrorist Group (CTG) nga giila sab sa mga kaubanan nga si Elian, Wally, Chan, ug Kuya. Siya sab ang igsuon ni kanhi Anakpawis Congressman Ariel Casilao.
Gidentina na ang lider sa mga rebelde sa Criminal Investigation and Detection Group 11 dinhi sa dakbayan sa Davao.
via || Bombo LJF
