DAVAO CITY – Gidagsa atol sa Holy Week ang usa sa mga bag-ong destinasyon sa Marilog District, Davao City. Giila kini nga Majestic Peak, usa ka suruyanan dili lamang sa mga nangita og adventure, kundi alang sab sa pagpalig-on sa ilang pagtuo.
Garbo sa maong lawak ang nindot nga 360 degree view sa mga nagpalibot nga buntod sa maong bahin sa dakbayan, lakip na ang usa ka dagkong krus nga nagbarog atubangan sa maanindot nga kinaiyahan.
Sumala pa sa wa nagpailang tag-iya sa maong luna, natukod ang 2.8-hectare nga atraksyon tungod sa panginahanglanon sa mga kabatan-onan nga ibansay ang ilang pagtuo taliwala sa pag-usbaw sa teknolohiya.
Kinyentos ka mga lakang ang kinahanglang latason aron maabot ang krus. Mamahimo nga mabisita sa mga turista ang Majestic Peak sa kantidad nga P50 alang sa entrance fee diin ang malikom niini, mupadulong sa nagpadayong pagtukod sa San Miguel Parish.
Sugod kaniadtong Huwebes Santo, gidagsang na kini sa mga turista agig paghinumdom sa ilang lig-ong obligasyon matag Semana Santa mao ang Via Crucis kon Way of the Cross. Maadtuan ang Majestic Peak sa Barangay Marahan, Marilog District, Davao City.
