DAVAO CITY – Malampusong nakauli sa ilang mga tagsa-tagsa ka panimalay sa Balut Island, Sarangani, Davao Occidental ang duha ka mga mananagat nga gi-rescue sa Indonesian Army sa Marore Island.
Sumala pa sa Philippine Coast Guard Station Davao Occidental nga gikatalang nawala kaniadtong Pebrero 18 ang mga mananagat nga giilang sila Indri Pawi, 52 anyos, ug Germinyo Pawi, 32 anyos, human sila namasol sa katubigan sa Marore Island duol sa border sa Indonesia.
Sa dihang, giigo ang gisakyang pump boat sa gapnod hinungdan nga naunlod kini. Pebrero 19 dihang napalgan sila sa mga sundalong Indones nga nagsinggit og tabang kanila ug dali silang gihaw-as sa kadagatan.
Gilayong nakigkoordinar dayon ang Indonesia sa Bureau of Immigration.
Marso 1 dihang gi-repatriate ang mga managat pabalik sa nasud hangtud nakabalik na sila sa ilang mga panimalay niadtong Huwebes, Marso 2.
Nagpasalamat ang mga nahisgutan sa duha ka coast guard nga nagtabang kanila nga makauli sa ilang mga pamilya human sa maong insidente. Samtang, nagpaabot na og hinabang ang LGU sa mga na-repatriate nga mga mananagat.
via || Bombo LJF
