DAVAO CITY – Laraw karon sa City Government of Davao nga ilusad ang programa sa national government nga 4PH o ang Pambansang Pabahay Para sa Pilipino ni Pangulong Bongbong Marcos.
Gumikan kana sa nahimong resulta sa pakigpulong ni Davao City Mayor Sebastian Duterte kang DSWD Sec. Rex Gatchalian human sa pagbisita niya sa evacuation center sa mga nasunogan sa Piapi Boulevard ning dakbayan nga naka-ugdaw sa 1,200 ka mga kabalayan niadtong Pebrero 25.
Gikanayon ni Presidential Assistant for Eastern Mindanao Sec. Leo Abellera Magno, pagasugdan sa national government ang proseso sa pagpadayon sa maong housing program.
Dugang pa nga trabahuon sa LGU ang pagtudlo sa mga mamahimong benepisyaryo sa 4PH nga nahimutang sa mga minimum wage earners, informal settlers, mga nagpuyo sa danger zones, ug mga pamliyang naglaom og simple, barato og kumportableng puloy-anan.
Makigpulong sunod simana ang Davao City LGU sa mga opisyal sa Department of Housing Settlements and Urban Development alang sa implementasyon sa maong programa.
Una nang gilagdaan kaniadtong Pebrero 16 ang Memorandum of Understanding tali Department of Housing Settlements and Urban Development ug Office of the Presidential Assistant for Eastern Mindanao alang sa paglusad sa maong housing project sa Eastern Mindanao nga gilangkuban sa Davao del Norte, Davao Del Sur, Davao Oriental, Davao de Oro, ug Davao City.
via || Bombo LJF
