DAVAO CITY – Gikabutyag sa Traffic Enforcement Unit sa Davao City Police Office nga wala pa gikasuhan ang drayber sa puti nga pick-up nga si Jester Yucosing, nga nakakabos sa kinabuhi sa hit and run victim nga si Anna Mae Talili kaniadtong Enero 26 sa kaadlawon sa Tulip Drive, McArthur Highway, ning dakbayan.
Sumala pa sa hepe sa TEU nga si PMaj. Dexter Domingo, gumikan kana sa hangyo sa pamilya ni Anna Mae nga humanon una ang ilang pagbangutan sa kamatayon sa ilang unica hija.
Laraw sa pamilya nga ipasaka na’g dayon ang kaso human sa lubong sa biktima karong Pebrero 4, adlawg Sabado.
Posibleng ipasang-at sa pamilya ang kaso batok kang Yucosing nga reckless imprudence resulting to homicide, physical injury, and damage to property karong Lunes sunod simana.
Dugang pa sa hepe nga wala sab nila gitanggal ang posibilidad ug probabilidad nga mag-atubang sab ug silot sa balaod ang tag-iya a pick up nga si Vice Mayor John Paul Lampig tungod sa pagpanag-iya sa maong behikulo.
Nag-endorse na ang TEU ngadto sa LTO 11 nga ipa-summon ang lisenysa sa bise mayor alang sa tukmang disposisyon.
Gikanayon sab sa igsuon sa biktima nga si Anafe nga andam na ang tanang mga ebidensya alang sa kasong ipasaka batok sa mga responsable, ug ingon mang nagpasalamat sa mga otoridad alang sa ilang paglihok aron makab-ot ang hustisya sa kamatayon ni Anna Mae.
via || Bombo LJF
