DAVAO CITY – Usa ka eroplano ang gikatahong nakatugpa ug balik sa Davao International Airport bandang alas-5:47 sa hapon kagahapon, gumikan sa technical issue sa aircraft.
Gikumpirma sa tigpamaba sa Philippine Airlines na si Cielo Villaluna nga nilupad ang eroplanong Airbus A321 nga dunay flight number PR1816 pagka-alas-4:34 sa hapon sakay niini ang 199 ka mga pasahero, apan luwas nga nakabalik ang eroplano sa maong airport sulod sa nahisgutang oras.
Sumala sa global flight tracking service website nga flightradar24.com, paingon sa Manila ang nahisgutang flight og nakabalik ang maong eroplano paingong Davao Airport lima ka minuto human sa pag-take off.
Apan una pa man kini nag-landing, nagtuyok-tuyok ug walo ka beses ang maong eroplano nga na-track dapit sa may Talicud Island sa Island Garden City of Samal aron magpahigayon og fuel burn procedure aron malikayan ang overweight landing.
Wala pa nagpagawas og pahayag ang Philippine Airlines mahitungod sa maong panghitabo apan gikumpirma sa usa ka pasahero nga nahitabo ang maong emergency landing tungod sa pressurization issues sulod sa eroplano.
via || Bombo LJF
