DAVAO CITY – Gipanghatagan ug hinabang sa Mati City LGU ang mga residente sa pipila ka mga purok nga gipang-stranded atol sa pagdahili sa usa ka bahin sa yuta sa may Barangay Don Salvador Lopez, Mati City, Davao Oriental.
Malampusong nahatud sa mga sakop sa Mati CDRRMO ang 414 ka food packs gikan sa DSWD ug PSWDO ngadto sa mga purok sa Upper Cangusan, Lower Cangusan, Tabon-Tabon, Sangay, Sta. Cruz, Biasong ug New Camotes.
Nag-unod ang matag food packs og 15 kilos nga bugas ug 12 ka delata matag pamilya.
Nasayran nga una nang gilaraw nga ihatod ang mga hinabang pinaagi sa airlift operationa apan nakansela kini kagahapon tungod walay luwas nga tugpahanan ang lugar.
Busa personal kining gikuha sa Mati CDRRMO kauban ang disaster unit sa barangay ug gitunol kini sa mga volunteers taliwala sa lapukon nga kadalanan.
Nakatala na ug usa ka patay ang maong insidente diin nakalot atol sa gipahigayong search and retrieval operation sa miaging adlaw ang usa ka Roverto Ampo, 52 anyos, residente sa susamang barangay.
Sa kasamtangan, duha na lamang ang ginapangita karon sa mga rescuers nga sila Jethro Paglanson Quilat, 14 anyos; ug John Gel Paglanson Casaligan, 15 anyos.
Sa pikas bahin, temporaryong gipahunong ang search and retrieval operation gumikan sa padayong paglihok sa yuta sa landslide area ug daot nga kahimtang sa panahon.
via || Bombo LJF
