DAVAO CITY- Mudawat na ug mga enrollees ang pagaablihan nga City College of Davao alang sa musunod nga school year.
Gikanayon ni Davao City Information Office Head Harvey Lanticse, gilauman na ang full operation sa bag-ong tulunghaan sunod tuig samtang nagdagan na sab ang admin operations alang sa mga uban pang gikinahanglan sa pag-abli niini.
Magdawat na ug mga enrollees ang tulunghaan sa mga kursong Bachelor of Special Needs Education, Bachelor of Technical-Vocational Teacher Education, Bachelor of Physical Education, Bachelor of Science in Entrepreneurship, ug Bachelor of Arts in English or Filipino.
Target sab sa kolehiyo nga mukuha ug usa ka libong working senior high school students gikan sa Bangoy National High School, Sta. Ana National High School, Crossing Bayabas National High School, ug Davao City National High School.
Wala pay opisyal nga anunsyo ang tulunghaan mahitungod sa pagsugod sa enrolment.
Kahinumdumang unang gipadayag sa lokal nga panggamhanan ang pagtukod sa tulunghaan sa lima ka ektaryang luna sa Bureau of Plant Industry duol sa UP Mindanao sa Bago Oshiro, Mintal ning dakbayan; human giaprubahan ni kanhi Mayor Sara Duterte isip urgent ang usa ka sugyot balaudnon nga giduso ni Councilor Pilar Braga niadtong tuig 2020.
Tumong sa pagmugna sa bag-ong City College of Davao, prayoridad niini ang mga estudyanteng anaa sa mga low wage earners, indigenous peoples, mga estudyante gikan sa Alternative Learning System ug Late Afternoon Program.
via || Bombo LJF
