DAVAO CITY – Usa ka alyas Kenny ang napatay sa usa ka operasyon human matud pa misukol sa kapulisan niadtong Sabado pasado alas-10:25 sa gabii, sa Purok San Miguel, Barangay Centro, Agdao, Davao City.
Sigun sa report, miresponde ang Sta. Ana Police Station sa lugar diin gikataho nga dunay naglatagaw nga armadong akyat bahay.
Gisulayan pa ug dakop sa kapulisan ang hamtong nga suspek apan namatikdan nilang nagdala kini ug pistola ug kalit na gihulbot kini.
Apan, una pa siya nagpabuto sa iyang armas, naunahan siya ug pusil sa mga otoridad. Gisulayan pa ug dala sa suspek sa Southern Philippines Medical Center apan gideklara siyang dead on arrival.
Nakuhaan ang suspek ug usa ka kalibre punto 38 nga pistola, mga bala, ug usa ka pakete sa gidudahang shabu.
Nasayran nga una nang nalambigit si alyas Kenny sa kasong Republic Act no. 9165 kon Comprehensive Dangerous drugs Act of 2002 niadtong Agosto 2019 apan nakagawas kini ug niapil sa mga serye sa pagpangawat subay sa ilang pagpanubay.
via || Bombo LJ Florendo
