DAVAO CITY- Pasakahan og kaso sa kapulisan ang duha ka mga suspek sa pagpanglugos sa usa ka 16-anyos nga dalaga sa Ecoland ning siyudad.
Sumala ni PMAJ. Rose Aguilar, Station Commander sa Ecoland Police Station, gipaabot na lang nila nga mugawas ang warrant of arrest alang sa pormal nga pagdakop sa mga suspetsado.
Sa pagkakaron, nakig-alayon na usab ang Ecoland PNP ngadto sa pamilya sa biktima alang sa ihatag niining assistance sa menor de edad nga biktima ilabi pa nga nakasinati kini og grabe nga trauma.
Una ng nadakpan si Aljun Abuda Piyayo Jr. alyas “Abion”, 26 anyos ug residente sa Ecoland, Barangay 76-A ning siyudad, nga gitudlong utok sa pagpanglugos.
Apan, napatay kini human nga nangilog sumala pa og armas sa mga police escort nga midala kaniya sa Southern Philippines Medical Center (SPMC) gumikan kay mireklamo kini og pagpanakit sa iyang tiyan.
Si Piyayo ug ang duha ka nahisgutan nga mga suspek nga nagpabiling gawasnon ang positibong giila sa biktima nga maoy milugos kaniya niadtong Oktobre 30, 2022.
Subay sa imbestigasyon, gikan ang biktima misimba apan pag-abot niini sa usa ka awaaw ug sagbuton nga bahin sa Ecoland, giguyod ug gitabangan kini og lugos sa tulo ka mga batan-on.
Samtang, tinguha karon sa pamilya ilabi na sa inahan sa biktima nga usa ka OFW, nga madakpan sa labing dali nga panahon ang duha ka gawasnong mga suspek aron nga mahatagan og hustisya ang gidangatan sa anak niining menor de edad.
