DAVAO CITY – Nagkahiusa ang mga environmental groups sa gikasugyot nga Green Agenda ngadto sa mga konsehal sa dakbayan sa Davao.
Sa usa ka press conference nga gilusad sa Interfacing Development Interventions for Sustainability, SALIGAN Mindanaw, ug Sustainable Davao Movement, ilang gihingusgan ang mga inisyatibo alang panalipdan ang kinaiyahan sa dakbayan.
Usa na diha ang ilang baruganan alang sa realignment sa Samal Island-Davao City Connector Bridge aron maprotektahan ang mga corals ug ubang pang mananap sa mga kadagatan sa Davao Gulf, ug ang pagpabuhi usab sa Davao Gulf Management Council alang sa panginabuhian sa mga mananagat ug pag-amuma sa mga mangrove forests.
Lakip sab sa mga nahisgutan ang striktong pagpatuman sa Watershed Code of 2007 alang sa mga protected watershed areas, regulasyon sa paggamit ug pestisidyo sa mga pananom, dili pag-uyon sa gilaraw sab nga Waste-to-Energy facility ug pagbalik sa segregation isip nag-unang solusyon sa nagkapundok nga basura sa syudad, ug ang pagmugna ug mga green spaces taliwala sa pag-uswag sa dakbayan sa natad sa urban development.
Gikanayon ni Atty. Tanya Rosales sa SALIGAN Mindanaw nga magmugna ang panggamhanan sa Davao City ug environment code isip sumbanan sa mga katawhan sa pagprotekta sa kinaiyahan.
Anaa sa maong forum ang mga konsehal sa Davao City ug mga representante ni Vice Mayor Melchor Quitain.
Nanumpa ang mga konsehal nga ilang suportahan ang mga gikasugyot nga inisyatibo alang sa pag-amuma sa kinaiyahan sa syudad.
via || Bombo LJ Florendo
