DAVAO CITY- Gikalipay pag-ayo sa mga vegetable producers ug traders gikan sa mga hilit nga distrito ning syudad ingon man sa mga kasikbit nga munisipalidad ang pag-abri sa Davao Food Terminal Complex (DFTC) nga maoy magsilbing opisyal nga wholesale facility alang sa mga prutas ug gulay sa Davao City.
Nahimutang ang maong terminal sa Barangay Daliao sa Toril District diin bag-ohay lamang usab kining gi-abrihan niadtong Oktobre 18 ning kasamtangang tuig.
Muabot sa kinatibuk-ang 27 ka mga representante sa vegetable producers, farmers’ associations ug mga kooperatiba gikan sa Paquibato, Marilog, Baguio, Toril, ug Tugbok district ang mitambong sa opening sa maong pasilidad.
Anaa sab ang mga private trader groups gikan sa Bankerohan ug Toril ug mga traders gikan sa Davao del Sur ug Davao del Norte. Sumala ni Joseph R. Laborte, presidente sa Highland Vegetable Growers Association (HVGA) gikan sa Tugbok District nga usa matud pa ka dakong tabang alang sa mga gagmay’ng mag-uuma ang katukuran sa DFTC gumikan pinaagi niini, aduna nay direct market ug area kung asa mamahimo silang makabaligya sa ilang produkto sa taas nga presyo.
Nasayran nga kung sa area lamang matud pa sa mga farmers kuhaon ang produkto, anaa lamang kini sa siete hangtud otso pesos matag kilo apan pag-abot sa DFTC, medyo taas-taas na kini.
Sa pikas bahin, aduna sab duha ka mga trucks ang gi-deploy sa City Agriculturist Office (CAGRO) diin maghatag kini og transportation assistance sa mga farmers’ cooperatives nga walay sakyanan aron maka-deliver sa ilang produkto sa food terminal.
