DAVAO CITY- Gipasalig sa Department of Trade and Industry (DTI) – Davao nga ning kasamtangan, nagpabilin pa gihapon nga stable ang presyo sa mga nag-unang palaliton sa rehiyon. Kini subay sa bag-ohay lamang nga gipahigayong monitoring sa buhatan. Kahinumduman nga gi-activate bag-ohay lamang ang Price Monitoring Committee diin mao kini ang gitahasan nga mag-monitor sa mga presyo sa mga gipangbaligyang basic commodities diri sa syudad. Gikanayon ni Atty. Dianne Bay Grado, Legal Officer III sa DTI-Davao, nga aduna gihapoy pipila ka mga prime commodities nga nagbaton og dyutay nga pagmahal sa presyo gumikan na usab sa transportation cost nga gidugang sa mga negosyante sa retail prices. Sa pikas bahin, gi-activate sab ang Regional Price Monitoring Committee diin pinaagi niini, laumang ubay-ubay ka mga negosyo ang imonitor sa DTI diri sulod sa rehiyon kung nagsubay ba kini sa tama nga presyon. Sa pikas bahin, ang Regional Price Monitoring Committee mao usab ang responsable panahon sa kalamidad aron nga walay mga negosyanteng makapahimulos sa pagpasaka og presyo sa ilang mga produkto.
