DAVAO CITY – Naghangyo si Davao City Tourism Committee Chairman ug Second District Councilor Al Ryan Alejandre nga tukion pagbalik ang mga gipatumang protocols ug travel restrictions alang sa mga langyawng bisita ug mga mamumuhunan sa dakbayan human namatikdang nagakunsad na ang mga nagpositibong kaso sa COVID19.
Apan, gipahimangnuan ang mga langyaw nga mubisita diri sa Davao City nga sundon gihapon ang tanang mga quarantine protocols aron malikayan ang pagkuyanap sa makukuyaw nga COVID19.
Gikanayon ni Davao City COVID19 Task Force Spokeperson Dr. Michelle Schlosser nga i-require gihapon ang tanang mga turista nga mag-fully vaccinate ug dili na kinahanglan ang negative nga resulta sa RT-PCR test, subay sa gipatumang Resolution No. 168 sa Interagency Task Force.
Gipaklaro sab ni Schlosser nga kinahanglan gihapong sundon sa mga langyaw ang mga balaod susama na lamang sa pagrespeto sa katawhang Pilipino sa mga quarantine standards sa ubang nasud.
Kahinumdumang usa ka Australyano ang gisita sulod sa Davao International Airport human nagpakita ug negative results sa RT-PCR test apan napakyas sa pagpakita sa iyang vaccination status maong wala na kini gipasulod sa dakbayan.
via || Bombo LJ Florendo
