DAVAO CITY – Lauman nga mas daghan ang mudagsa nga mga pasahero sa bus terminal ning syudad atol sa All Souls’ Day ug All Saints’ Day o mas nailang kalag-kalag human ang duha ka tuig nga travel restrictions gumikan sa pandemya.
Sumala ni Aisa Usop, manager sa Davao City Overland Transport Terminal (DCOTT), nga isip pagpangandam sa pag-abot sa mga byahero atol niining nahisgutang panahon, gilatag na sa DCOTT ang mga kinahanglang security measures aron masiguro ang kaluwasan sa mga pasahero.
Gikanayon ni Usop nga ang mga security staff sa DCOTT ang bahinon aron ma cover ang three-shift rotation alang sa 24-hour niini nga operasyon.
Sa pikas bahin, aduna sab augmentation gikan sa Task Force Davao ug sa kapulisan ning syudad diin aduna kini kaugalingon nga police outpost sulod sa terminal.
Aron sab nga magarantiya ang “road-worthiness” sa mga bus, nakigkoordina na sab ang DCOTT ngadto sa Land Transportation Franchising and Regulatory Board (LTFRB) XI ug the Land Transportation Office (LTO) XI.
Dugang pa niini, nakig-alayon sab ang terminal sa City Transport and Traffic Management Office (CTTMO) aron masiguro ang hapsay nga pag-agi sa mga bus ilabi na sa terminal drive.
Gibutyag sab ni Usop nga ang 30-minute interval tali sa mga bus ang suspendido atol sa busy nga mga adlaw o panahon.
Text by || Bombo Allianne Ferandos Silao
