DAVAO CITY- Gikumpirma ni Captain Edo Lobenia, tigpamaba sa Bureau of Jail Management and Penology (BJMP XI), nga pinaagi na sa ingestion o ginatulon na ang iligal nga druga aron nga mapalusot kini sulod sa prisohan.
Dugang pa ni Lobenia nga nagbaton sila og intensified intelligence gathering gumikan adunay mihatag og impormasyon kanila nga mao na kini ang ginahimong katikaran sa mga Persons Deprived of Liberty (PDL).
Matud pa sa opisyal nga ginatulon na sa mga tigpayuhot ang iligal nga druga gumikan hilabihan ka istrikto ang pagdumala sa Davao City Jail ilabi na sa mga gaduaw sa mga piniriso diin hugot ang pagbantay sa buhatan aron nga wala gayu’y makasulod nga suplay sa druga.
Ang pahayag ni Captain Edo Lobenia, tigpamaba sa BJMP XI. Kahinumduman nga kaniadto, lahi ang modus operandi sa mga tigpalusot og druga diin ginasulod nila kini sa sensitibo nga mga parte sa ilang kalawasan.
Subay sa maong panghitabo, gikanayon ni Lobenia nga ang tanang mga committed PDL ilabi na gikan sa PNP ug PDEA stations ang ginapainom nila og tambal aron nga makapagawas sa ilang hugaw gumikan walay Xray machines nga makahimo sa pagsuta kung aduna bay foreign objects sulod sa lawas sa usa ka piniriso.
Samtang, hugot sab nga mibahad ang opisyal sa mga adunay dautang planong pagpalusot og iligal nga druga sa prisohan nga dili na lamang musulay o dili nalang kini ipadayon gumikan hugot gayud ang ginapatumang pagbantay sa City Jail.
