DAVAO CITY – Pormal nang giablihan kagahapon ang mga kasaulogan atol sa ika-37 nga Kadayawan Festival.
Sa labing unang higayon human sa duha ka tuig nga pagkahunong niini gumikan sa pandemya hatud sa COVID-19, mamahimo nang masinatian pagbalik sa mga dabawenyo ingon man sa mga langyaw nga turista ang panaghiusa sa unse ka mga tribo sa dakbayan alang sa pagsaulog sa kaabunda, kalinaw ug kalampusan.
Tungod niini, giablihan na ang Kadayawan Village sa may Magsaysay Park diin makita ang mga nagkadaiyang kultura ug tradisyon sa matag payag o balay sa unse ka mga tribo.
Anaa sa opening ceremony si Davao City Mayor Sebastian Baste Duterte uban ang 11 ka mga tribal leaders sa dakbayan.
Magpahigayon sab og cutural presentations sa may Bantawan Ampitheater sa likod sa Kadayawan Village.
Gipahigayon sab kagabii ang 3D Mapping Light Show diin girepresenta ang mga hulagway sa kasaulogan sa ala-silver screen nga Davao City Hall.
Gidagsang ang unang gabii sa mga manan-away ug gikalingawan sab kini gumikan sa mga maanindot nga pasundayag sa maong light show.
Makita kini matag alas-sais hangtud alas-nuwebe sa gabii, hangtud Agosto 30.
Unyang gabii, Agosto 6, magpahigayon og Hiyas sa Kadayawan Cultural Presentation o Talent Night sa Bantawan Ampitheatre sa Magsaysay Park; Misa Pasasalamat ug Pag-abli sa Kadayawan sa Agosto 15; Hiyas sa Kadayawan Coronation Night sa Agosto 17; Sayaw Kadayawan ug Bantawan sa Agosto 18; Dula Kadayawan sa Agosto 19; ug ang gikahinamang Indak Indak sa Kadayawan sa Agosto 20.
Sa Agosto 21, mag-sarado ang maong festival pinaagi sa Pamulak sa Kadayawan, Pitik sa Kadayawan ug Tambayayong sa Kadayawan.
Via || LJ Florendo
