DAVAO CITY – Abli na alang sa publiko ug katawhang Dabawenyo ang bag-o ug modernong Davao City Library & Information Center (DCLIC) diin kahinumduman nga kagahapong adlawa lamang, hingpit nga gipahigayon ang pag-inagura ug pag-blessing niini.
Ang maong City Library ang anaa lamang nahimutang sa C. Bangoy St (former Ponciano) ning syudad.
Atol sa inagurasyon kagahapon, mismong si Davao City Mayor Sebastian “Baste” Duterte ang personal nga mitambong alang sa pagpanguna sa maong seremonya. Gawas kang Mayor Baste, anaa usab si Davao City Vice Mayor Melchor Quitain, Jr, National Library of the Philippines Director Cesar Gilbert Adriano, City Librarian Salome Enoc, mga City Hall department heads ug uban pang mga naghina-hinam nga Dabawenyo.
Ang modernong building sa DCLIC ang anaa sa upat ka andana diin aduna kini mga reading areas alang sa mga kabatan-onan ingon man aduna usab alang sa mga adults.
Aduna sab amphitheatre sa maong building ingon man conference rooms ug information technology center. Aduna say coffee shop sa maong City Library diin nahimutang kini sa first floor. Sa gusto usab og presko nga hangin, aduna say nahimutang nga open air organic garden sa rooftop sa maong gambalay.
Kinahanglan lamang ang paggamit sa Davao Safe QR app aron makasulod sa library. Apan aron hingpit ma-experience ang DCLIC ug makahimo sa pagbasa sa daghanang mga libro, kinahanglan lamang nga mokuha og library card sa kantidad nga 30 pesos samtang 100 pesos usab alang sa usa ka regular ID card o PVC ID card diin aduna kini validity nga hangtud usa ka tuig.
Karong adlawa, opisyal na kining gi-abrihan sa publiko diin abli kini sugod alas 7 sa buntag hangtod alas 7 sa gabii, Lunes hangtod Biyernes.
Makita usab nga bisan unang adlaw pa lamang sa pag-abli niini, gidagsa gilayon kini sa daghang tawo.
Via || Allianne Gnel Susanne Ferandos
