DAVAO CITY – Nagbaton na ug epekto sugod kagahapong adlawa June 20, 2022 ang usbaw sa binulang sweldo sa mga katabang sa balay sa Davao region.
Subay sa Wage Order No. RB XI-DW-02 nga gipahawas sa Regional Tripartite Wages and Productivity Board sa Department of Labor and Employment sa Davao Region (DOLE-Davao), makadawat na ang mga kasambahay sa rehiyon ug P4,500 nga sweldo matag bulan.
Subay sa wage order, P1,500 nga usbaw ang gipatuman alang sa chartered cities ug first class municipalities samtang P2,500 usab alang sa uban pang mga munisipalidad.
Gikanayon ni DOLE-Davao Regional Director Randolf Pensoy nga ang nahisgutang wage order ang epepktibo sugod sa June 20, samtang ang wage hike increase alang sa mga pribadong sektor ang epektibo usab niadtong June 19.
Dugang pa ni Pensoy nga ang kanhi minimum wage alang sa mga kasambahay sa rehiyon maoy pinaka-ubos sa tanan hinungdan nga ilang gi-aprubahan ang dugang usbaw niini.
Ang kasamtangan nga minimum wage nga 4,500 ang madawat sa tanang mga kasambahay bisan asa man nga dapit sa region 11 kini nahimutang.
Subay sa wage order, ang mga kasambahay ang kinahanglan nga swelduhan matag bulan nga walay deductions gawas lamang niadtong nasubay sa balaud sama sa SSS, PhilHealth, ug Pag-Ibig contributions.
Dugang pa ni Pensoy, pahamtangan ug silot ang mga employers nga dili motuman sa wage increase, diin multahan ug P25,000 hangtud P100,000 o pagka-priso sulod sa 2 – 4 ka tuig.
Applicable usab ang nahisgutang mga silot ngadto sa mga pribadong sektor.
