Mipresenta sa Office of the City Prosecutor sa Davao City karong Biyernes, Oktubre 23, si Davao City 1st District Representative Paolo “Pulong” Duterte aron pormal nga mosang-at og reklamo sa libelo batok sa pipila ka mga mamamahayag ug media executives.
Base sa complaint-affidavit, gilakip sa reklamo sila National Bureau of Investigation (NBI) Director Melvin Matibag, Rodulfo Gracioso Jr., Felipe L. Gozon, Gilberto R. Duavit Jr., Mel Tiangco, Vicky Morales, Emil Sumangil, Darlene Cay, Marvin Parado ug Joel San Luis, lakip usab si John ug Jane Does.
Giingong may kalabotan ang reklamo sa kontrobersiya nga mitumaw human ni Rodulfo Gracioso Jr. nag-angkon nga nagdala siya og mga maleta nga giingong adunay sulod nga kuwarta alang sa pamilya Duterte. Gilimod sa kampo sa pamilya Duterte ang maong mga alegasyon.
Kahinumduman nga una nang gisaway ni Vice President Sara Duterte ang GMA News tungod sa giingong kakulang sa beripikasyon sa mga pahayag ni Gracioso, usa ka kanhing pulis nga natangtang sa serbisyo.
May kalabotan usab sa mga alegasyon ang pagbisita ni VP Sara sa Northern Samar niadtong Mayo 2022 ug ang giingong pagdawat og kuwarta. Gipatin-aw sa bise presidente nga ang mga litrato nga nagpakita kaniya uban kang Gracioso dili, matud pa niya, pamatuod sa ilang personal nga relasyon o sa bisan unsang ilegal nga kalihokan.
Sa pagkakaron, ang pagsang-at sa reklamo ni Cong. Pulong Duterte kabahin sa nagpadayon nga legal nga kontrobersiya nga naglangkit sa mga alegasyon ni Gracioso ug sa mga pahayag sa kampo sa pamilya Duterte.
