Nagpahimangno ang United Nations o UN sa posibleng grabeng epekto sa umaabot nga Super El Niño ug nanawagan sa mga nasod nga molihok dayon aron maandam ang mga komunidad sa posibleng kadaot niini.
Gilauman nga maabot sa kinapungkayan ang Super El Niño sa Disyembre karong tuiga ug magpadayon hangtod sa 2027 ug posibleng sa mosunod pang mga tuig.
Sumala kang World Meteorological Organization o WMO Secretary-General Celeste Saulo, posibleng mahimong wala pa sukad masinati ang kakusog sa maong El Niño, nga molapas pa sa mga sukdanan sa ilang gigamit nga monitoring charts sulod sa miaging 40 ka tuig.
Dugang pa ni Saulo, anaa na karon ang grabeng mga panghitabo sa panahon ug gilauman nga mas modaghan ug mosamot pa kini samtang nagkakusog ang El Niño.
Tungod niini, nanawagan ang ahensya sa hiniusang aksyon sa tibuok kalibotan, ilabina alang sa mga nasod ug minilyong katawhan nga labing bulnerable sa epekto sa maong panghitabo.
Pagpasabot ni Saulo nga dili mapugngan ang El Niño, apan mahimo pang malikayan ang grabeng epekto niini sa kinabuhi sa mga tawo pinaagi sa sayong pagpangandam.
Matud kang UN Undersecretary-General for Humanitarian Affairs Tom Fletcher, posibleng grabeng maapektuhan ang Latin America, sidlakan ug habagatang Africa, ingon man ang Asia ug rehiyon sa Pasipiko.
Lakip sa gikabalak-an ang pagpahawa o pagbalhin sa mga komunidad, pagsaka sa presyo sa krudo ug abono, ug pagkunhod sa pinansyal nga tabang.
Gipasidaan ni Fletcher nga napulo ka milyon ka tawo ang posibleng manginahanglan og humanitarian assistance, samtang gibanabana nga 50 milyong katawhan ang mahimong makasinati og grabeng kagutom.
Nanawagan usab siya sa mga gobyerno, development banks, ug international financial institutions nga motabang sa pagpangandam sa mga komunidad ayha mahitabo ang posibleng kadaot.
Kahinumdoman nga kaniadtong 2023, ang El Niño nalambigit usab sa grabeng kainit sa kalibotan, diin nahimong ikaduhang pinakainit nga tuig sa kasaysayan. Samtang, ang 2024 maoy nakarekord sa pinakataas nga global average temperature sa kasaysayan sa modernong estimates niini.
