Nanghangyo ang mga piskal sa International Criminal Court nga dawaton isip ebidensiya ang naunang mga testimonya sa unom ka saksi nga adunay impormasyon kabahin sa mga pagpatay atol sa mga operasyon sa kapulisan, lakip ang Oplan Tokhang ug “One Time, Big Time,” sa kaso ni kanhing Pangulong Rodrigo Duterte.
Sa ilang mga dokumento, giila sa prosecution ang mga saksi nga adunay code nga P-0024, P-1357, P-1359, P-0008, P-1164 ug P-1303. Matud sa mga piskal, ang ilang mga testimonya makadugang ug makapalig-on sa ubang ebidensiya bahin sa giingong pamaagi ug sumbanan sa kapintasan sa kapulisan atol sa kampanya batok sa ilegal nga droga.
Gamiton na lamang ang naunang narekord nga testimonya sa unang tulo ka saksi imbes nga ipatawag sila aron motestigo sa personal. Lakip sa testimonya ni P-1359 ang mga pagpatay nga may kalabotan sa Tokhang tali sa 2016 ug 2018, lakip ang mga litrato sa mga biktima, mga mensahe nga nahimutang sa ilang mga lawas, ug mga dokumento sa giingong extrajudicial killings.
Matud sa maong saksi, gidid-an siya ni kanhing Philippine National Police chief ug karon Senador Ronald “Bato” dela Rosa sa pagtabang sa imbestigasyon sa Commission on Human Rights kabahin sa mga pagpatay. Si Dela Rosa giila sa ICC isip giingong kauban sa paghimo sa mga krimen sa kaso ug adunay outstanding arrest warrant alang sa crimes against humanity.
Samtang, gihangyo usab sa prosecution ang Trial Chamber III nga tugotan ang dugang nga personal nga pagpangutana sa tulo pa ka saksi P-0008, P-1164,ug P-1303 aron mapadali ang husay. Lakip sa ilang mga testimonya ang mga operasyon sa kapulisan nga miresulta sa mga pagpatay, lakip ang “One Time, Big Time.”
Dugang kini sa siyam pa ka saksi kansang mga testimonya gipangayo usab sa prosecution nga dawaton o ipailalom sa cross-examination.
Gilauman nga magsugod ang husay ni Duterte sa Nobyembre 30, 2026 sa The Hague, human matino sa ICC nga kaya niyang pisikal ug mental nga moapil sa mga proceedings. Magsugod ang husay sa opening statements sa prosecution ug sa mga legal representative sa mga biktima, samtang adunay kapilian ang depensa nga mopresentar usab sa kaugalingong opening statement.
