Nagpasidaan ang Department of Foreign Affairs sa Chinese Embassy sa Pilipinas sa posibleng dugang nga diplomatic action tungod sa sunod-sunod nga mga post niini sa social media nga giisip nga komprontasyonal ug dili angay sa mga diplomat.
Misugod ang kontrobersiya human sa pahayag ni Chinese Ambassador Jing Quan kaniadtong Oktubre 15,2026 diin iyang gitubag ang komento ni Defense Secretary Gilberto “Gibo” Teodoro Jr. nga China ang bugtong nagpahinabo og kasamok sa Southeast Asia. Giisip sa DFA ug ni Pangulong Ferdinand Marcos Jr. nga hulga ug dili diplomatiko ang pahayag, hinungdan nga gipatawag ni Foreign Secretary Teresa Lazaro ang embahador aron ipahayag ang baruganan sa Pilipinas.
Human niini, gisaway sa Chinese Embassy ang pipila ka senador ug kongresista nga nanawagan nga ideklarang persona non grata si Jing, ug gihagit silang ipadayon ang maong lakang.
Sa laing bahin, miingon si Teodoro nga ang mga pag-atake sa embahada mahimong pagpanghilabot sa internal nga politika sa Pilipinas ug makapaluya sa baroganan sa nasod sa panagbangi sa West Philippine Sea.
Apan, giingon ni kanhing National Security Adviser Clarita Carlos nga gikuha kuno sa konteksto ang pahayag ni Jing ug gipasidaan ang mga magbabalaod sa posibleng epekto sa diplomasya ug ekonomiya kon ideklarang persona non grata ang embahador.
Mitubag si Philippine Coast Guard spokesperson for the West Philippine Sea Rear Adm. Jay Tarriela, nga nagkuwestiyon sa rekord ni Carlos sa pagdepensa sa katungod sa Pilipinas sa West Philippine Sea.
Bisan pa sa kontrobersiya, gipamatud-an pag-usab sa Manila ang pagsunod sa One-China Policy, samtang gipasiugda sa DFA nga ang mga pahayag sa embahada makadaot sa pagsalig ug paningkamot nga mapaayo ang relasyon sa Pilipinas ug China.
