DAVAO CITY – Nagpagula karon ang lokal nga kagamhanan ug temporaryo nga pag-ban sa mga poultry ug mga by-products gikan sa Luzon ug uban pa nga areas nga adunay gikataka nga kaso sa highly pathogenic avian influenza (AI) o bird flu.
Subay sa kopya sa executive order ni Mayor Inday Sara Duterte-Carpio, temporaryo nga gisuspende karon sa siyudad ang pagsulod sa domestic ug captured wild birds, produkto ug by-products kalakip na ang piso, itlog, semelya, manure ug uban pa nga gikan sa kaulohan ug ubban pa nga areas nga adunay natala nga kaso sa Avian Influenza diin epektibo gilayon kini nga ipatuman.
Sa mga adunay ibiyahe nga game fowls, pato, pigeons, o kadtong adunay madakpan nga wild birds, kinahanglan nga aduna kini dala nga veterinary health certificate diin nakasulat dinhi ang farm asa kini naggikan ug kinahanglan walay natala nga insidente sa bird flu.
Magtugot sab ang EO sa pag-transport o pagpadala sa game fowls gikan sa Davao City paingon sa uban nga probinsiya.
Hugtanon sab nga ginadili ang game fowls pabalik sa Davao gawas kung adunay negative AI test result nga gikuha gikan sa dapit diin kini naggikan.
Kahinumduman nga sa ulahing report gikan sa city veterinarian’s office (CVO), nagpabilin karun nga gawasnon ang siyudad gikan sa bird flu.
Samtang gikanayon ni Dr. Cerelyn Pinili, CVO chief, nga nakatutok sila karon sa monitoring sa Talomo ug Tugbok areas diin adunay nahimutang nga mga commercial poultry farms.
Hugtanon nga lakang sab ang gipatuman sa mga musulod nga poultry products gikan sa Tacurong, Sultan Kudarat ug sa pinakaduol nga AI-hit area sa siyudad.
Dugang checkpoint sab ang gipahimutang sa entrada nga bahin sa gikan sa North Cotabato paingon dinhi sa dakbayan ug sa Buda ingon man Marilog areas, kalakip na sa Arakan–Dalaglumot, Marilog boundary.
