DAVAO CITY – Gitino ni Davao City Overland Transport Terminal (DCOTT) Manager Aisa Usop, nga wala pa silay nadawat nga reklamo kalabot sa gikanayong fixer nga nagatanyag ug reservation sa mga bus nga gusto sakyan sa mga pasahero.
Una niini nanawagan si Usop sa mga pasahero nga likayan ang susama nga transaksiyon arun nga malikayan ang overcharging sa pamasahe.
Gikanayong sagad ginahimo sa mga fixer mao ang pagtagbo sa mga pasahero dayon mutanyag kini ug reservation sa mga pampasaherong bus bugti sa bayad.
Hinuon gikanayon sa mga konduktor sa bus nga kinahanglan sa ticketing booth lamang muadto ang mga pasahero o direkta lamang ngadto kanila ug dili sa lain nga mga tawo.
Plastada sab sumala pa karon ang pamaagi sa DCOTT diin isyuhan gilayon ug ticket ang mga pasahero sa higayon nga makalingkod na kini sa bus.
Gihimo sa pamunoan sa terminal ang nahisgutan nga pahimangno aron nga makalikay ang pasahero sa doble nga gasto ayha sila mubiyahe.
