DAVAO CITY – Gihulat na lamang karun sa City Covid-19 Task Force Vaccination Cluster ang kamandoan gikan sa Department of Health (DOH) gumikan kay andam na matud pa ang ilang rollout sa anti-Covid second booster dose sa tanan nga mga miyembro sa immunocompromised population nga 18 anyos pataas.
Sumala pa kang Dr. Josephine Villafuerte, cluster head, nakadawat na sila ug guidelines sa administration sa second booster dose nga gikan sa National Vaccination Operations Center (NVOC) apan wala pay schedule nga fix alang sa local government units gawas lamang National Capital Region (NCR). nga nakasugod na sa ilang second booster dose.
Base sa DOH Interim Operational Guidelines sa Administration sa 2nd Covid-19 Vaccine Booster Doses ngadto sa Immunocompromised Population (ICPs), ang mga indibidwal nga 18 anyos pataas ang eligible nga makadawat sa second Covid-19 booster dose bisan nga kini homologous o heterologous.
Kahinumduman nga ang mga bakuna batok Covid-19 nga adunay EUAs nga gi-isyu sa Philippine Food and Drug Administration (FDA) ug gi-aprubahan nga gamiton alang sa second booster ang gilangkuban sa Pfizer, Moderna, Sinovac, Sinopharm, ug AstraZeneca.
Ihatag ang second booster dose sa mga indibidwal nga fully vaccinated ug tulo ka bulan na ang milabay sukad kini nakadawat sa iyang first booster dose.
