DAVAO CITY – Nakahimo karun pagsubay ang ahensiya sa City Disaster Risk Reduction Management Office (CDRRMO) sa dakbayan ug duruha gikan sa lima ka mga earthquake fault lines sa rehiyon.
Sumala pa ka ang CDRRMO head retired Police Colonel Alfredo Baloran ang nahisgutan nga mga fault lines ang nahiumutang sa Lacson ug Dacudao nga nagsubay sa pipila ka mga barangay sa dakbayan.
Nasubay ang Lacson ug Dacudao Faultlines human nga nakig-alayon ang ahensiya ngadto sa Phivolcs.
Dugang ni Baloran, nagsugod ang maong aktibidad tulo ka tuig na ang milabay atol sa pre-Covid-19 pandemic time, apan sa kasamtangan duruha sa lima ang fault lines pa lamang ang ilang nasubay.
Gitataw sab sa CDRRMO head nga nakiglambigit sila sa Phivolcs arun nga mapadayon ang aktibidad sa hinanali nga panahon ilabi na nga crucial sumala pa ang pagsubay sa mga nahabilin nga faultlines sa siyudad.
Ang mga areas sulod sa Lacson ug Dacudao Faultlines ang gibutngan na ug CDRRMO signages aron nga dali na lamang nga masayud ang publiko sa mga faultline areas, apan pipila sa mga residente ang mireklamo gumikan kay nahimong hinungdan sa pagpanic sa mga residente ang nahisgutan nga signages.
Kahinumduman nga sa milabay nga mga semana, sunod-sunod nga nakatala ang pipila ka mga lugar sa Davao region ug kusog nga mga pagtay-og nga maoy hinungdan nga daghanang mga empleyado ug estudyante ang nanggawas sa mga gambalay.
Una na sab nga nagpahimangno ang CDRRMO nga kinahanglan seryosohon ang mga nakat-onan sa mga earthquake drill nga dakung tabang arun nga maluwas ang kaugalingon ilabi na kung nahimutang sa mga delikado nga lugar.
