DAVAO CITY – Walay undang otoridad sa paglusad ug mga operasyon batok sa mga nalambigit sa ginadili nga druga ug gipahugtan pa karon ang kampanya batok sa mga nalambigit niini.
Kahinumduman nga mikabat sa kapin tres milyones ka pesos sa marijuana ang gipangsunog sa Kiblawan Davao del Sur.
Sumala sa kapulisan sa lalawigan anaa sa 19,500 fully grown marijuana plants o mubalor sa P3,900,000.00 ang gipanglarut sa bukiron nga bahin sa lugar.
Una ng gipahigayon ang eradication niini sa Sitio Kiarang ug Sitio Akbuling Brgy. Bulol-salo, Kiblawan sakop sa Kiblawan Municipal Police Station.
Sa gipahigayon nga pagpanubay, aduna pay nabilin nga mga plantasyon sa marijuana nga duol na sa utlanan sa Region 12.
Doble karun ang pagpaningkamut sa otoridad arun hingpit na nga matapos ang suliran sa illegal nga druga ug mahilakip sa mga ideklara isip barangay cleared sa Philippine Drug Enforcement Agency XI.
Kahinumduman nga ubay-ubay na ka mga barangay sa Davao region ang hingpit na nga gideklara nga drug free human ang hugtanon nga kampanya sa otoridad ingon man pagpatuman ug mga programa arun malikayan ang susama nga suliran sa katilingban.
