DAVAO CITY – Nakasinati na usab ug pagbaha ang lungsod sa Sto Tomas sa Davao del Norte gumikan sa kusog nga pag-ulan sukad kagabii hangtud kaganinang buntag.
Gawas sa Sto Tomas nakasinati usab ug pagbaha ang lungsod sa Carmen ug ang uban pang mga kasikbit nga mga dapit niini. Tungod niini, paspas nga gipadala ni Mayor Ernesto Evangelista ang mga ekipo ug ang mga personahe sa municipal disaster office ug MSWD aron atimanon ang mga residente nga apektado sa pagbaha.
Nagtinabangay ang mga sakop sa rescue team, mga sundalo ug ang mga personahe sa munisipyo aron tabangan ang mga biktima sa baha.
Gipahimangno na usab sa Sto Tomas LGU ang mga residente nga mag-igmat ug mobiya gilayon sa ilang mga pinoy-anan sa higayon nga magpadayon ang pagsaka sa tubig baha ilabi na niadtong mga naa nagpuyo daplin sa kasapaan, ug niadtong mga pamilya kansa kabalayan naa usab nahimutang sa tiilan o duol sa kabukiran diin sagad mahitabo ang mga pagdahili sa yuta.
