DAVAO CITY – Nakarekober na ug nakauli na sab sa ilang mga pinuy-anan ang pipila ka mga residente nga una ng naapektohan sa Diarrhea outbreak sa Barangay Naga Laak Davao de Orosa milabay nga semana.
Kahinumduman nga sa gipagula nga datus sa Local Government Unit sa Laak kagahapon, anaa na sa 30 ang nagmaayo sa balatian ug nakauli na sa ilang mga panimalay samtang 8 ka mga outpatient patient department ingon man 29 ang kasamtangang anaa pa sa Davao De Oro Provincial Hospital sa Laak ug padayon nga gi-obserhan sa mga doktor.
Hinuon gipasalig sa lokal nga kagamhanan nga padayon nila nga imonitor ang barangay ingon man ang gihimo karun nga active case finding sa medical team.
Kahinumduman nga human ang nasinatian nga outbreak, temporaryo nga gihimong Medical Shelter ang Barangay Hall sa Barangay Naga diin gipahimutang ang mga residente nga dili maayo ang kondisyon apan dili na kinahanglan nga dad-on sa balay tambalanan kini arun nga mamonitor sa mga medical workers.
Pabilin sab karun nga naka-stand by sa lugar ang Water Tanker, Water Bladder ug Water Filtration Unit arun adunay temporaryo nga makuhaan ang mga residente ug tubig human nga wala una gipagamit ang tinubdan sa tubig mainom sa mga residente samtang gihulat ang resulta sa eksaminasyon.
Una ng natala ang tulo ka mga residente nga nakabsan sa kinabuhi gumikan sa diarrhea outbreak samtang ubay-ubay sab ang nadala sa balay tambalanan.
