DAVAO CITY – Gikanayon ni Dr. Cerelyn Pinili, head sa City Veterinary Office nga gibisita na sa ilang mga personahe ang mga nanag-iya ug poultry farms o local growers sa siyudad kini arun mokuha ug samples sa ilang mga alagang mga manok apan subay sa ulahing resulta, negatibo kini sa bird flu nga kaylap karun sa kasikbit nga lugar sa Mindanao.
Nasayran sa opisyal nga anaa sa 60 ka mga samples ang ilang nakuha sa farm diin 10 gikan sa 300 ka mga namatay bag-ohay pa lamang ang negatibo sa bird flu.
Samtang gitataw sab sa opisyal nga posibleng gigikanan sab karun sa bird flu ang mga migratory birds hinungdan nga gipahimangnoan niini ang mga residente nga magpalayo sa maong mga langgam arun nga malikayan ang pagkatag sa kagaw.
Tipik lamang kini human nga daghanan sumala pa karun ang namatikdan nga mga migratory birds sa Bucana area ning siyudad.
Kahinumduman nga liboan ka mga itik sa usa ka Barangay sa Magsaysay Davao del Sur ang gipailalom sa culling o pagpatay gumikan sa kaso sa bird flu nga maoy hinungdan nga apektado karun ang panginabuhian sa mga nanag-iya ug poultry.
Adunay namatikdan sab nga pagnihit sa mga mamalit ug karneng manok sa palengke gumikan sa kahadlok sa bird flu.
