DAVAO CITY – Gikanayon ni Joseph Randy Loy, head sa Provincial Disaster Risk Reduction and Management Office (PDRRMO) Davao de Oro nga laumang musaka pa ang ihap sa kinatibuk-ang residente nga apektado sa halapad nga pagbaha sa Davao de Oro human nga ila ng gitigom karon ang mga listahan sa mga apektadong residente.
Sa ulahing datus anaa na matud pa sa 4,800 ka mga pamilya o kapin 8,000 ka mga indibidwal ang mibakwit apan musaka pa kini sa higayon nga makumpleto na nila ang datus.
Nasayran sab sa opisyal nga halos tanan nga mga munisipyo sa Davao de Oro ang nakasinate ug pagdahili sa yuta kini dungan pa gihapon sa walay undang nga pag-ulan gumikan sa nasinatian nga Low Pressure Area (LPA).
Samtang subay sumala pa sa inisyal nga datus nga natala kalabot sa kadaut sa Agrikutura sa lalawigan, natala sumala pa nila ang kapin P78 milyones ka pesos.
Samtang nagpahigayon na sab sumala pa ug mga nagkadaiyang lakang karun ang mga apektadong munisipalidad arun lamang matubag ang panginahanglanon sa mga apektadong residente.
Gani giduso na sab ang resolution alang sa hinanali nga pagdeklara sa state of calamity aron nga mapagula gilayon ang gikinahanglan nga pundo nga makatabang sa mga nagkadaiyang munisipalidad nga naapektohan sa halapad nga pagbaha.
