DAVAO CITY – Naglaum karon ang Department of the Environment and Natural Resources (DENR) nga mapatuman na ang Waste-To-Energy (WTE) project sa lokal nga kagamhanan arun nga hinanaling masolusyonan ang suliran sa basura sa siyudad.
Sumala pa kang Benito Antonio de Leon, Undersecretary for Enforcement, Solid Waste Management, Local Government Units Concern and Attach Agencies, sa higayon nga mapatuman ang nahisgutan nga proyekto kini ang labing una nga WTE project.
Sa kasamtangan gisugdan na sa lokal nga kagamhanan nag pag-explore sa WTE isip waste management option upat ka tuig na ang nakalabay human nga ang kasamtangan nga sanitary landfill sa dakbayan ang hapit na sa full capacity.
Gitataw ni De Leon nga kung maayo ang resulta sa maong proyekto, ipatuman na sab kini sa uban nga lugar sa nasud sama sa Quezon City ug Cebu City.
Kahinumduman nga una ng gibutyag ni Mayor Sara Duterte-Carpio sa iyang ulahing SOCA nga nakiglambigit karun ang lokal nga kagamhanan ngadto sa DENR arun nga maka-secure ug P740 million gikan sa gikinahanglan nga P3.5 billion arun nga mapatuman ang maong proyekto.
Sa kasamtangan, hugtanon sila nga nakiglambigit sa uban nga national government agencies aron nga makakuha ug gikinahanglan nga pundo.
Kahinumduman nga sa milabay nga Setyembre sa tuig 2021, gi-anunsiyo sa lokal nga kagamhanan nga makiglambigit kini sa sister city Kitakyushi sa Japan alang sa planong katukuran sa maong proyekto human ang nahimong rekomendasyon sa Davao Regional Council.
