DAVAO CITY – Gipangandaman na sab karon sa lokal nga kagamhanan ang pagpahigayon ug Special Vaccination Days sa Marso 29, 30 ug 31.
Kini human ang malampuson nga pagpahigayon sa National Vaccination Day IV sa Davao region.
Apan sa nahisgutan nga vaccination program, target niini nga ma-cover ang primary ug booster doses sa 18 anyos pataas nga mga indibidwal ingon man ang primary doses alang sa mga dose anyos.
Gikanayong ang estratehiya nga himuon sa Special Vaccination mao ang “ Tutok and Suyod Barangay”, diin tutukan niini ang mga dili bakunado nga indibidwal sa matag barangay.
Arun masiguro ang taas nga turn-out sa vaccination, subayon sa mga munisipalidad ang Top 3 hangtud Top 5 ka mga barangay nga adunay taas nga ihap sa mga dili bakuna nga mga indibidwal.
Gani mamahimo sumala pa nga muadto ang vaccination teams sa kasikbit nga barangay sa higayon nga matapos na ang mga identified barangay.
Girekomenda sumala pa sa mga nag-edad ug 18 anyos pataas ang bakuna nga Janssen as primary dose samtang ang Pfizer, Astra Zeneca, Sinovac, ug Moderna ang booster dose.
Ang 12 hangtud 17 anyos nga vaccinees ang makadawat ug Pfizer o Moderna isip primary dose.
Ang NVD IV ang miresulta sa 92% accomplishment diin miabot sa 41,932 ang vaccinations as of March 19 gikan sa target sa primary dose nga anaa sa 45,650.
Sa mga nakapailalom na sa ilang booster dose atol sa National Vaccination Day IV, misaka kini sa 11,048 o 41% sa 27,254 target.
Sa kinatibuk-an, ang Davao Region nakaangkon na ug 73% sa ilang target alang sa NVD IV nga anaa sa 52,980 vaccinations.
