DAVAO CITY – Gikanayon ni Assistant Regional Director sa Department of Health (DOH)-Davao nga si Dr. Gerna Manatad nga sukad sa milabay nga Marso 5, 2022, nakatala ang Davao region ug 82.46 percent sa kinatibuk-ang total active cases nga dili mga bakunado batok Covid-19.
Kini sumala pa ang hinungdan nga padayon ang pagpaningkamut sa ahensiya nga mapalig-on pa ang vaccination drive sa rehiyon arun masiguro nga magpadayon ang pag-ubos sa ihap sa mga dili bakunado nga nagpositibo sa Covid-19.
Padayon sab ang pag-awhag sa ahensiya sa publiko ilabi na sa mga wala pa nabakunahan nga pahimuslan ang Bayanihan Bakunahan: National Vaccination Day nga matapos sa Marso 12, 2022.
Una na sab nga gibutyag ni Dr. Janis Olavides, focal person sa Covid-19 Vaccination Program sa DOH-Davao, nga naglaum sila nga vaccination makapalig-on sa demand sa bakuna sa mga probinsiya sanglit ang vaccination drive ang mihinay sa milabay nga mga semana.
Namatikdan sab karon sa DOH ang pag-ubos sa mga active cases sa milabay nga duruha ka semana.
Subling gipasabot sa ahensiya nga ang pagbakuna lamang ang bugtong pamaagi arun nga adunay igong proteksiyon sa kaugalingon ug dili musangpot sa kritikal ang kondisyon.
