DAVAO CITY – Lauman nga muhatod ug grabe nga kadaut sa Agrikultura sa lalawigan sa Davao del Norte kini tungod pa gihapon sa halapad nga nasinatiang pagbaha gumikan sa sunod-sunod nga pag-ulan sa lugar.
Kahinumduman nga anaa sa kapin 2 mil ka mga pamilya ang apektado sa pagbaha sa nagkadaiyang lugar sa Davao del Norte sukad pa sa milabay nga adlaw hangtud na kagahaping adlawa.
Gani pipila sa mga residente ang nagpabilin pa gihapon karon sa mga evacuation center ug naghulat pa ug abiso kung kanus-a sila makabalik sa ilang tagsa-tagsa ka mga pinuy-anan.
Aduna pa gihapoy halapad nga pagbaha sa mga lugar sa Asuncion, Kapalong ug Carmen.
Samtang padayon sab karon ang gipahigayon nga monitoring sa Provincial Disaster Risk Reduction and Management ilabi na nga padayon pa gihapon ang nasinatian nga mga pag-ulan sa Davao region.
Arun masiguro ang kaluwasan sa mga residente sa lugar, una ng nagpagula ug kamandoan ang lalawigan sa Asuncion nga sakop sa nahisgutan nga dapit ug suspensiyon sa trabaho ingon man klase sa mga estudyante.
