DAVAO CITY – Gipasalig karon sa Davao City Police Office (DCPO) nga human nga gitugot na ang pag-serve ug alak sa mga restaurants ug susama nga mga business establishments, pahugtan pa sa safety ug security cluster ang ilang pagmonitor sa mga business establishments ug mga indibidwal.
Sumala pa kang DCPO chief Colonel Alberto Lupaz, mas daghanang mga police personnel ang ilang ipakatag aron lamang mapatuman ang minimum public health standards (MPHS) sa mga anaa sa public areas.
Sumala pa kang Dr. Michelle Schlosser, tigpamaba sa Davao City Covid-19 Task Force, nga mas daghanan na nga city government personnel ang mo-assist sa pagmonitor sugod kagahapong adlawa.
Ang nahisgutan nga mga personahe ang maggikan sa City Health Office, City Tourism Office, ug City Transport and Traffic Management Office diin hatagan ang mga nahisgutan ug otoridad nga maka-isyu ug citation tickets ug makasikop ug mga violators.
Gitataw sab sa nahisgutan nga ang lokal mga kagamhanan mamahimong molimita na sab lihok sa higayon nga subli na sab nga musaka ang Covid-19 cases dungan sa pagpalu-ag sa mga restrictions.
Ang mga masinupakon sa safety protocols mamahimong pahamtangan ug sanction subay sa 2020 revised rules and implementation sa Republic Act No. 11332 o ang Mandatory Reporting of Notifiable Diseases and Health Events of Public Health Concern act.
Kahinumduman nga sukad Pebrero 15, 2022, gipatuman na ang Executive Order No. 5 Series of 2022 diin tugtan na ang pag-serve ug pag-inom ug alak sa mga bars, videokes, hotels ug uban pang mga establisyemento nga abli sa publiko.
