DAVAO CITY – Positibo karon ang lokal nga kagamhanan nga maangkon ang 100 percent herd immunity dungan sa pilot rollout sa pediatric vaccination alang sa mga bata nga edad 5 hangtud 11 anyos nga gikatakda nga magsugod karung adlawa, Pebrero 14, 2022.
Sa higayon nga daghanan na ang mabakunahan nga mga dabawenyos, igo na ang proteksiyon batok Covid-19.
Una ng gibutyag ni Dr. Michelle Schlosser, tigpamaba sa Davao City Covid-19 Task Force nga paningkamutan sa Vaccination Cluster Team sa nga mabakunahan ang anaa sa 269,121 ka mga bata nga edad singko hangtud 11 anyos dungan sa pilot pediatric vaccination rollout karong adlawa.
Laoman sumala pa nga ang mga establisyemento diin ipahigayon ang pagbakuna ang non-threatening, friendly, ug fun kini aron nga makumbinsi ang mga bata nga magpabakuna.
Kalakip sa mga mopartisipar karong adlawa ang gilangkuban sa Southern Philippines Medical Center (SPMC), Davao Doctors Hospital (DDH), DMSF Hospital, ug Seamen’s Hospital.
Plano karon sa lokal nga kagamhanan nga magpahimutang ug lain pa nga vaccination site nga alang sa bata sa higayon nga matapos na ang duruha ka semana nga pilot rollout sa balay tambalanan.
Giduso sab karon sa Vaccination Cluster Team ang pagpahigayon ug rollout sa mga LGU-managed vaccination hubs alang sa pediatric group sa Pebrero 21, 2022. Diin dinhi sa dakbayan sa Davao, plano kini nga ipahigayon sa Almendras Gym, Vicente Hizon Elementary School, ug San Roque Elementary School isip inisyal nga venue alang sa rollout.
