DAVAO CITY – Hingpit na nga gipasiga kagahapong adlawa sa Tagum City ang ilang Tagum City Giant holiday tree nga maoy usa sa pinakataas nga Christmas tree sa tibuok nasod.
Nahimutang kini sa Tagum City Hall Grounds sa nahisgutan nga siyudad. Gitambongan ang pagpasiga niini sa mga residente sa Tagum City diin matag tuig nila kini nga ginapahigayon.
Una ng nasayran nga mas taas karon ang Christmas tree sa Tagum nga miabot ug ug 195 feet kung itandi kaniadtong milabay nga tuig nga anaa sa 193 feet. Aduna sab kini 6,255 ka mga LED bulbs.
Luyo sa nasinatian nga pandemiya, daghanan sa mga residente sa Tagum City ang nakabati pa gihapon sa diwa sa kapaskohan.
Gigamitan ang maong Christmas tree ug lima ka mga kolor diin ang kolor blue misimbolo sumala pa sa inspirasyon , kolor green sa harmony, yellow sa positivity and hope, puti sa purity ug pula sa courage.
Gipasigarbo sab sa lokal nga kagamhanan sa Tagum nga kapin 80 porsyento sa mga bulb nga gigamit ang recycle o nagamit na nila sa milabay nga tuig.
Naandan na sa mga Tagumenyos ang maong aktibidad pagsulod sa Disyembre matag tuig ingon man ang pagpahigayon ug fireworks display sa ilang siyudad.
