DAVAO CITY – Bisan nga anaa na karon sa kapin 70 percent herd immunity alang sa first dose sa Covid-19 vaccines sa siyudad, plano pa gihapon karon sa lokal nga kagamhanan nga mopartisipar sa tulo ka adlaw nga “National Vaccination Day.”
Una ng ipahigayon ang maong aktibidad sa Nobyembre 29 hangtud na sa Disyembre 1, 2021. Tumong niini nga mabakunahan ang 15 million ka mga tawo latas sa tibuok nasod.
Mismong si Mayor Sara Duterte-Carpio ang nagkumpirma nga mopartisipar ang siyudad sa maong aktibidad.
Kahinumduman nga naka-administer ang siyudad ug 951,686 first doses hinungdan nga naangkon na karon ang 73.21 percent coverage gikan sa target nga 1.2 million herd immunity, samtang 875,080 doses ang nabakunahan ug second dose hinungdan nga aduna nay target nga 67.31 percent.
Luyo sa daghanang ihap sa mga nabakunahan karong panahona, dili pa gihapon kini igo aron nga makab-ot ang 1.2 million Dabawenyos ayha matapos ang kasamtangan nga tuig.
Gitataw sab sa Mayor nga sa nahisgutan nga adlaw sa aktibidad, magpahigayon sab ang siyudad ug mobile vaccination.
Una na sab nga gikanayon ni konsehal Mary Joselle Villafuerte, committee chairperson on health, nga gipahugtan sab nila karon ang routine immunization ngadto sa mga kabataan ilabi na nga ubos sumala pa ang turnout niini.
