DAVAO CITY – Nagpahimangno ang usa ka opisyal sa Davao City COVID-19 Task Force ngadto sa mga ginikanan nga mas maayong dili lamang una dad-on ang mga minor de edad sa mga mall ug uban pang lugar nga daghan ug tawo sanglit mamahimo kini ang daling matakdan ug coronavirus disease (COVID-19) ug posibleng mamahimong “potential spreaders” sa ilang mga panimalay.
Sumala pa kang Dr. Michelle Schlosser, Task Force spokesperson, nga bisan miubos na karon ang kaso sa Covid-19, nagpabilin pa gihapon ang bahad niini.
Una ng namatikdan sa lokal nga kagamhanan nga daghanang mga ginikanan ang nagdala sa ilang mga anak sa malls sukad nga gipa-ubos sa alert level status ang siyudad sa Alert Level 2 gikan sa Level 3 sukad kaniadtong Nobyembre 15 hangtud 30.
Gipasabot si Schlosser nga ang mga bata partikular na kadtong nag-edad ug 11 anyos paubos ang dali nga makaangkon ug infection gumikan kay walay extra proteksiyon ang mga nahisgutan pinaagi sa bakuna.
Naglaum na lamang karon ang mga health authorities nga magbinantayon ang mga ginikanan sa pagdala sa ilang mga anak sa mga crowded o high-risk areas ug limitahan ang ilang lakaw sa mga mahinungdanon lamang nga katuyoan.
